Tvennir Evróvisjóntónleikar voru haldnir í Hofi laugardaginn 5. maí þar sem Evróvisjónlög frá 1956 til dagsins í dag voru flutt. Gestir töldu hátt í eitt þúsund og mikil ánægja ríkti meðal þeirra með frammistöðu flytjenda. Söngvararnir Friðrik Ómar og Regína Ósk fóru á kostum. Þau slógu á létta strengi milli laga og hrifu áheyrendur með vönduðum söng sínum og sviðsframkomu og voru sérlega glæsileg þegar þau sungu lagið This is my life í viðhafnarútgáfu í tilefni tónleikanna. Friðrik Ómar vakti sérstaka lukku í gervi Fridu  úr ABBA íklæddur fjólubláum pallíettukjól, rauðum háhæluðum skóm og með myndarlegt liðað rautt hár.
Sinfóníuhljómsveitin, með hljóðfæraleikurum SN og nemendum úr TA, undir stjórn Guðmundar Óla Gunnarssonar þótti ljá áður þekktum lögum nýjan tón með góðu liðsinni 25 manna kórs og bakradda í  hljómsveitarútsetningum Matis Podra. Flutningur Evróvisjónfaranna Gretu Salóme og Jónsa á laginu Never forget setti svo punktinn yfir i-ið og vakti mikla lukku og fólk var sérlega ánægt tækifærinu að sjá og heyra lagið “live”. Tónleikarnir enduðu með standandi lófaklappi, húrrahrópum og blístri og allt ætlaði vitlaust að verða þegar hljómsveitin og söngvarar fluttu uppklappslagið Nína. Einn tónleikagesta komst svo að orði: Ég upplifði ljúfan fortíðarhroll, hló mig máttlausan, táraðist að því hvað við eigum góða söngvara og hljóðfæraleikara og klappaði þar til mér var illt í lófunum.

SN þakkar flytjendum og áheyrendum fyrir frábæran laugardag

Evróvisjón  á Akureyri fer alla leið þann 5. maí. Uppselt er á tónleikana kl. 18:00 og aukatónleikar kl. 21:00 sama kvöld eru komnir í sölu.

“Þetta verður  tólf stiga Evróvisjónpartý með lögum frá 1956 til dagsins í dag ásamt íslenska framlaginu í ár ” segja þau Friðrik Ómar og Regína Ósk sem stíga á stokk með SN og TA á laugardaginn ásamt þeim Gretu Salóme og Jónsa. Greta og Jónsi eru hæstánægð með að fá tækifæri til að flytja lagið sitt í Hofi. “ Þetta er frábær æfing fyrir Aserbajdjan segir Greta, það er ekki hægt að klikka á þessu með 45 manna sinfóníuhljómsveit, 20 manna kór auk bakradda. við hlökkum rosalega til”

Það verður mikið um dýrðir þann 5. maí kl. í 18:00 Hofi. Sinfóníuhljómsveit Norðurlands í samstarfi við Tónlistarskólann á Akureyri flytur lög sem keppt hafa í Evróvisjón  frá 1956 til dagsins í dag. Gamla, góða Evróvisjónstemningin mun svo sannarlega ráða ríkjum þegar lifandi sinfóníuhljómsveit undir stjórn Guðmundar Óla Gunnarssonar ásamt kór, bakröddum og frábærum söngvurum stígur á stokk. Þau Regína Ósk og  Friðrik Ómar ganga til liðs við SN og heiðursgestir tónleikanna Greta Salóme og Jónsi flytja lagið “Mundu eftir mér” sem mun keppa fyrir Íslands hönd í Söngvakeppni evrópskra sjónvarpsstöðva nú í maí í Baku, Aserbaídsjan.

Tónleikarnir eru frábært tækifæri til að upplifa lifandi flutning á sígildum Evróvisjónslögurum, áheyrendur verða ekki sviknir en á efnisskránni eru m.a. lögin:
Save your kisses for me, Eitt lag enn, Waterloo, Hallelujah, Fly on the wings of love, Eldur,  Wild Dances, Nína, La det swinge, Gleðibankinn, Fairytale og Mundu eftir mér